Ala-ala

by: Alipappo

Ginunam-gunam ang mga guni guni

Sa pagsilang at pagmamahal ng isang bayani

Natapos ang hibik, muling bumangon ang bawat isa

Baya’y nagkaroon ng pagbabago at pag-asa.

Sa’yong pagtahak sa mga daluyong

Karunungan at larangan ang iyong sunong sunong

Pagkadalubhasa mo’y ginamit sa pakikipaglaban

Ni walang dugong dumanak sa kaninuman.

Sa bawat hagod ng iyong pluma

Pagmamahal sa baya’y ipinadama

Ipinahayag, inilantad walang pag aatubili

Damping paninikil ng mga naghari.

Isang bayani ng karunungan at paninindigan

Iyan ka kung ika’y maturingan

Tunay ngang kahanga-hangat tinitingala,

‘Sang katulad mong dalubhasa.